Binjaket me 87 ditë dallim

Binjaket irlandeze, Amy  dhe Katie Elliott janë disa muajshe, megjithatë ndodhen në rrugë për t’u bërë të famshme.

Të dy motrat kanë lindur me tre muaj dallim. Amy u lind më 1 qershor të vitit 2012, ndërsa motra e saj Kejti 87 ditë më vonë, më 27 gusht të vitit 2012. Për “rekordin” e tyre është interesuar edhe Libri i rekordeve të Ginisit. 

Mjekët thonë se asnjëherë gjatë karrierës së tyre nuk kishin parë diçka të ngjashme, kurse lindja e motrave Elliott është baraz  “fitimit në lotari”.

Sipas shkrimit në Daily  Mail (Dejli Meil), e ëma e tyre Marija kishte hetuar kontraksionet e para qysh në javën e 23-të të shtatënësisë. Ishte vendosur në spital ku i kishte shpërthyer fshikëza e ujit, e pak më vonë kishte sjellë në jetë vajzën e vet të parë, Amy. Bebja shumë e vogël ishte vendosur në inkubator.

“Pas lindjes së Amy  isha shumë e lodhur, por isha e detyruar të koncnetrohem dhe të kujdesem për beben tjetër. Atëherë u ndërprenë kontraksionet. Thuajse nuk kisha lindur. Nisi të më kapë frika. Një fëmijë e kisha në neonatologji, tjetri mbështillej në barkun tim”, kishte rrëfyer  Marija.

Mjekët pastaj e këshilluan të presë dhe të pushojë. Tetëdhjetë e shtatë ditë më vonë, në javën e 36-të të shtatzënësisë, Marija lindi vajzën tjetër, Katie.

“Ishin tre muajt më të rëndë të jetës sime”, thotë nëna e re që kishte pritur lindjen e fëmijës tjetër që t’i regjistronte binjaket të njëjtën ditë në librin amëz, ndonëse me data të ndryshme të lindjes.